चारित्र्याच्या संशयावरून पतीने काढला पत्नीचा काटा

 


 पारा( राहुल शेळके ): पत्नीच्या चारित्र्याचा संशय घेऊन नराधम पतीने पत्नीच्या डोक्यात दगड घालून अंत्यत निर्दयी पद्धतीने खून केल्याची घटना शनिवारी  (दि.7मे ) रोजी वाशी तालुक्यातील पारा येथे उघडकीस आली आहे.

          याबाबत पोलिसांनी दिलेली माहिती अशी की, सखुबाई सुब्राव शिंदे रा. पारा ता. वाशी यांची मुलगी लालुबाई (वय 28वर्ष )हिचा विवाह तेरा वर्षांपूर्वी बापू मच्छिन्द्र काळे रा. इटकूर ता. कळंब यांच्या सोबत झाला होता. लालूबाईला तीन मुले आहेत. लालुबाईचा नवरा बापू काळे हा लग्न झाल्यापासून लालूबाईला दारू पिऊन विनाकारण चारित्र्यावर संशय घेऊन सतत मारहाण करत होता. त्यामुळे गेली पंधरा दिवसापासून लालुबाई आपल्या आईकडे पारा येथे राहण्यास आली होती. नंतर जावई बापू काळे हे सुद्धा गेली आठ दिवसापासून पारा येथे राहण्यास आले होते. दि.6मे रोजी दुपारी बापू काळे याने पत्नीस शेतात जाऊ असे म्हणून गायरानात नेऊन तेथे दोघांची भांडण होऊन त्याने दुपारी तीन वाजेपासून ते दुसऱ्या दिवशी सकाळी नऊ वाजेपर्यंत पारा शिवारातील गायरान जमिनीत तिला दगडाने डोक्यात, कपाळावर,  चेहऱ्यावर गंभीर दुखापत करून तिला जिवानिशी ठार मारून नातू मयुर बापू काळे याला पळवून घेऊन गेला आहे. अशा आशयाची तक्रार मयताच्या आईने वाशी पोलीसात दिल्यामुळे संशयित आरोपी बापू मच्छिंद्र काळे रा.ईटकुर ता.कळंब याच्याविरोधात कलम 302 नुसार गुन्हा दाखल झाला असून घटनास्थळास उपविभागीय पोलिस अधिकारी डंबाळे, पोलीस निरीक्षक दळवे, स. पो.निरीक्षक कांबळे, पो उ नि काळे, पो. उ. नि. निंबाळकर यांनी घटनास्थळाला भेट देऊन पाहणी केली. यावेळीफॉरेन्सिक लॅब पथक,आय बाईक पथक ,तसेच श्वान पथकासं पाचरण करण्यात आले होते.या प्रेताचे शवविछदन प्राथमिक आरोग्य केंद्र पारा येथे करण्यात आले. प्रेतावर अंत्यविधी इटकूर येथे करण्यात आले.या घटनेचा पुढील तपास पोलीस निरीक्षक दळवे  यांच्या मार्गदर्शनाखाली पोलीस उपनिरीक्षक किशोर काळे करत आहेत.

                यावेळी मयताच्या नातेवाईकांनी आरोपीस लवकरात लवकर अटक करावी अशी मागणी केली आहे.

Post a Comment

Previous Post Next Post